ಕೊಹ್ಲಿ ಹುಟ್ಟುಹಬ್ಬಕ್ಕೆ ಕನ್ನಡಿಗನ ಉಡುಗೊರೆ

Tue 8th Nov, 2016 Author: Kumar Prince Mukherjee

ಡೂಡಲ್‌ ಕಲಾಕೃತಿ ಅರ್ಪಿಸಿದ ಕಾಸರಗೋಡಿನ ಕರಣ್‌ ಆಚಾರ್ಯ * ಸೋಮಶೇಖರ್‌ ಪಡುಕರೆ ಬೆಂಗಳೂರು ಉಗ್ರ ಆಂಜನೇಯ ಕಲಾಕೃತಿಯ ಮೂಲಕ ಗಮನ ಸೆಳೆದ ಕನ್ನಡಿಗ ಕರಣ್‌ ಆಚಾರ್ಯ ಅವರು, ನ.5ರಂದು 28ನೇ ವರ್ಷಕ್ಕೆ ಕಾಲಿಡಲಿರುವ ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ಅವರ ಹುಟ್ಟುಹಬ್ಬಕ್ಕೆ ವಿಶೇಷ ಉಡುಗೊರೆ ನೀಡಿದ್ದಾರೆ. ಡೂಡಲ್‌ (ಗೀಚು ಚಿತ್ರ) ಮಾದರಿಯ ಈ ಕಲಾಕೃತಿಯು ಕೊಹ್ಲಿ ಅವರ ಕ್ರಿಕೆಟ್‌ ಬದುಕನ್ನು ವಿವರಿಸುತ್ತದೆ. ಆಕ್ರಮಣಕಾರಿ ಬ್ಯಾಟ್ಸ್‌ಮನ್‌ ಆಗಿರುವ ಕಾರಣ ಕಲಾಕೃತಿಯಲ್ಲೂ ವಿರಾಟ್‌ ಸೂಪರ್‌ ಮ್ಯಾನ್‌ ಆಗಿ ಮೂಡಿ ಬಂದಿದ್ದಾರೆ. ಟ್ಯಾಟು, ಬ್ಯಾಟ್‌, ವಿಕೆಟ್‌, ಜೆರ್ಸಿ ನಂಬರ್‌, ಬಿಸಿಸಿಐ ಲೋಗೊ, ಕ್ರೀಡಾಂಗಣ, ಹೊನಲು ಬೆಳಕು ಹೀಗೆ ಕ್ರಿಕೆಟ್‌ನ ಪ್ರತಿಯೊಂದು ಅಂಶವೂ ಈ ಚಿತ್ರದಲ್ಲಿ ಕಾಣಸಿಗುತ್ತದೆ. ಬ್ಯಾಟ್‌ ಹಾಗೂ ವಿಕೆಟ್‌ಗಳ ರಾಶಿಯ ಮೇಲೆ ಕೊಹ್ಲಿ ವಿರಾಜಮಾನರಾಗಿದ್ದಾರೆ. ಸೂಕ್ಷ್ಮವಾಗಿ ಅವಲೋಕಿಸಿದರೆ, ಕೊಹ್ಲಿಯ ಲವ್‌ ಲೈಪ್‌ನ ಚಿತ್ರಣವೂ ಇದೆ! ''ಕೊಹ್ಲಿಯ ಆಕ್ರಮಣಕಾರಿ ಆಟ ಇಷ್ಟ.ಹುಟ್ಟುಹಬ್ಬಕ್ಕೆ ಏನಾದರೂ ಉಡುಗೊರೆ ನೀಡಬೇಕೆಂದು ಯೋಚಿಸಿದ್ದೆ. ಸಾಮಾನ್ಯವಾಗಿ ಕ್ಯಾರಿಕೇಚರ್‌ ಎಲ್ಲರೂ ಮಾಡುತ್ತಾರೆ. ಸ್ವಲ್ಪ ಭಿನ್ನವಾಗಿ ಮಾಡೋಣ ಎಂದು ಯೋಚಿಸಿ ಡೂಡಲ್‌ ಕಲಾಕೃತಿ ರಚಿಸಿದೆ,'' ಎಂದು ಅನಿಮೇಟರ್‌ ಕರಣ್‌ ಆಚಾರ್ಯ ಹೇಳಿದ್ದಾರೆ. ಅನಿಮೇಷನ್‌ನಲ್ಲಿ ಪಳಗಿರುವ ಕರಣ್‌, ಖಾಸಗಿ ಕಂಪನಿ ಉದ್ಯೋಗದಿಂದ ಸಿನಿಮಾ ಕ್ಷೇತ್ರಕ್ಕೆ ಕಾಲಿಟ್ಟಿದ್ದಾರೆ. ''ವಿರಾಟ್‌ ಕೊಹ್ಲಿ ಈಗ ತುಂಬಾ ಬದಲಾಗಿದ್ದಾರೆ. ಮೊದಲಿನಂತೆ ತಪ್ಪಿನ ಹೊಡೆತಗಳಿಗೆ ಮನ ಮಾಡುವುದಿಲ್ಲ, ತಪ್ಪಾಗಿ ವರ್ತಿಸುವುದೂ ಇಲ್ಲ. ಗಳಿಕೆಯ ಭಾಗವನ್ನು ಅನಾಥಾಶ್ರಮಕ್ಕೆ ನೀಡುತ್ತಾರೆ. ಇಂಥ ಕ್ರಿಕೆಟಿಗರಿಗೆ ಕಲಾಕೃತಿ ನೀಡುವುದು ಹೆಮ್ಮೆ,'' ಎನ್ನುತ್ತಾರೆ ಕರಣ್‌.